ਲੰਡਨ: ਪੰਜ ਭਾਰਤੀ ਸਕੂਲਾਂ ਨੂੰ ਵਿਸ਼ਵ ਦੇ ਬਿਹਤਰੀਨ ਸਕੂਲਾਂ ਦੇ ਸਾਲਾਨਾ ਪੁਰਸਕਾਰਾਂ ਲਈ ਵੱਖ-ਵੱਖ ਸ਼੍ਰੇਣੀਆਂ ’ਚ ਚੋਟੀ ਦੇ 10 ’ਚ ਸ਼ਾਰਟਲਿਸਟ ਕੀਤਾ ਗਿਆ ਹੈ। ਇਹ ਪੁਰਸਕਾਰ ਸਮਾਜ ਦੀ ਤਰੱਕੀ ’ਚ ਉਨ੍ਹਾਂ ਦੇ ਮਹੱਤਵਪੂਰਨ ਯੋਗਦਾਨ ਲਈ ਦੁਨੀਆਂ ਭਰ ਦੇ ਸਕੂਲਾਂ ਨੂੰ ਸਨਮਾਨਿਤ ਕਰਨ ਦੇ ਉਦੇਸ਼ ਨਾਲ ਬਰਤਾਨੀਆਂ ’ਚ ਦਿਤੇ ਜਾਂਦੇ ਹਨ। ਪਿਛਲੇ ਹਫਤੇ ਮੱਧ ਪ੍ਰਦੇਸ਼ ਦੇ ਦੋ ਅਤੇ ਦਿੱਲੀ, ਮਹਾਰਾਸ਼ਟਰ ਅਤੇ ਤਾਮਿਲਨਾਡੂ ਦੇ ਇਕ-ਇਕ ਸਕੂਲ ਨੂੰ 50,000 ਡਾਲਰ ਦੀ ਇਨਾਮੀ ਰਾਸ਼ੀ ਲਈ ਵੱਖ-ਵੱਖ ਸ਼੍ਰੇਣੀਆਂ ਵਿਚ ਚੁਣਿਆ ਗਿਆ ਸੀ।
ਵਿਸ਼ਵ ਦੇ ਪੰਜ ਬਿਹਤਰੀਨ ਸਕੂਲ ਪੁਰਸਕਾਰ – ਭਾਈਚਾਰਕ ਸਹਿਯੋਗ, ਵਾਤਾਵਰਣ ਕਾਰਵਾਈ, ਨਵੀਨਤਾ, ਮੁਸੀਬਤਾਂ ’ਤੇ ਕਾਬੂ ਪਾਉਣ ਅਤੇ ਸਿਹਤਮੰਦ ਜੀਵਨ ਦਾ ਸਮਰਥਨ ਕਰਨ ਲਈ – ਕੋਵਿਡ ਦੇ ਮੱਦੇਨਜ਼ਰ ਬ੍ਰਿਟਿਸ਼ ਹੈੱਡਕੁਆਰਟਰ ਟੀ 4 ਐਜੂਕੇਸ਼ਨ ਵਲੋਂ ਸਥਾਪਤ ਕੀਤੇ ਗਏ ਸਨ ਤਾਂ ਜੋ ਸਕੂਲਾਂ ਨੂੰ ਇਕ ਪਲੇਟਫਾਰਮ ਦਿਤਾ ਜਾ ਸਕੇ ਜੋ ਅਪਣੇ ਕਲਾਸਰੂਮਾਂ ਅਤੇ ਇਸ ਤੋਂ ਬਾਹਰ ਜ਼ਿੰਦਗੀ ’ਚ ਫਰਕ ਲਿਆ ਰਹੇ ਹਨ।
ਟੀ4 ਐਜੂਕੇਸ਼ਨ ਅਤੇ ਵਰਲਡਜ਼ ਬੈਸਟ ਸਕੂਲ ਅਵਾਰਡ ਦੇ ਸੰਸਥਾਪਕ ਵਿਕਾਸ ਪੋਟਾ ਨੇ ਕਿਹਾ, ‘‘ਸਰਕਾਰੀ ਮੁੱਖ ਮੰਤਰੀ ਰਾਈਜ਼ ਮਾਡਲ ਐਚ.ਐਸ.ਐਸ., ਝਾਬੁਆ; ਰਿਆਨ ਇੰਟਰਨੈਸ਼ਨਲ ਸਕੂਲ, ਵਸੰਤ ਕੁੰਜ; ਜੀ.ਐਚ.ਐਸ. ਐਸ. ਵਿਨੋਬਾ ਅੰਬੇਡਕਰ ਨਗਰ, ਰਤਲਾਮ; ਕਾਲਵੀ ਇੰਟਰਨੈਸ਼ਨਲ ਪਬਲਿਕ ਸਕੂਲ (ਮਦੁਰਈ); ਅਤੇ ਮੁੰਬਈ ਪਬਲਿਕ ਸਕੂਲ ਐਲ.ਕੇ. ਵਾਘਜੀ ਇੰਟਰਨੈਸ਼ਨਲ (ਆਈ.ਜੀ.ਸੀ.ਐਸ.ਈ.) ਵਰਗੇ ਮੋਹਰੀ ਭਾਰਤੀ ਸਕੂਲ, ਜਿਨ੍ਹਾਂ ਨੇ ਇਕ ਮਜ਼ਬੂਤ ਸਭਿਆਚਾਰ ਵਿਕਸਿਤ ਕੀਤਾ ਹੈ ਅਤੇ ਨਵੀਨਤਾ ਕਰਨ ਤੋਂ ਨਹੀਂ ਡਰਦੇ, ਇਹ ਦਰਸਾਉਂਦੇ ਹਨ ਕਿ ਇੰਨੇ ਸਾਰੇ ਜੀਵਨਾਂ ’ਚ ਕਿੰਨੀ ਤਬਦੀਲੀ ਕੀਤੀ ਜਾ ਸਕਦੀ ਹੈ। ਦੁਨੀਆਂ ਭਰ ਦੇ ਸਕੂਲ ਉਨ੍ਹਾਂ ਦੇ ਹੱਲਾਂ ਤੋਂ ਸਿੱਖ ਸਕਦੇ ਹਨ ਅਤੇ ਹੁਣ ਸਮਾਂ ਆ ਗਿਆ ਹੈ ਕਿ ਸਰਕਾਰਾਂ ਵੀ ਅਜਿਹਾ ਹੀ ਕਰਨ।’’
